منورين

ومن غير مقدمات، المدونة حتحكي طرائف جيراني الأعزاء، على مدى 23 سنة اللي هو عمري عشت في بيوت كتير، بيت أهلي وجدتي واتنقلت برضه بين أحياء كتير من ضواحي لمناطق راقية لوسط البلد، وفي كل مكان كانت فيه ذكريات حلوة وغيرها اللي أكيد مش عايزة أفتكره، بس الأهم من ده كله كان فيه مواقف طريفة كتير وجيران مختلفين في كل حتة أروحها، الطيبين والجدعان، الرجالة والأنذال، وكل بيت له حكايات بعرفها بمزاجي أو غصب عني، بسمعها من أصحاب الحكايات نفسهم أو بتدخل آذاني من خلال شبابيك المناور، وفي كل حكاية مدلول، يا إما بعرف حاجة عن المجتمع اللي بيتغير يوم ورا يوم أو ساعة ورا ساعة، وبرضه بعرف الكتير عن نفسي، ايه اللي فايتني وايه اللي أنا كويسة من غيره.

المدونة دي حتجمع بين الواقع وفيها بعض الرتوش من الخيال عشان أحافظ على سيرة الناس اللي حكتب عنهم، الهدف من المدونة أكيد مش التسلية أو السخرية من شخص ولكني أقصد بيها إني ألفت نظر البعض عن قيم مندثرة في المجتمع وحاجات تانية مش حاقدر أقول عليها قيم وللأسف بتبوظ الحاجات الحلوة اللي اتربينا عليها.

تحياتي،

نهى